A alcaldesa, Inés Rey, recibiu esta mañá aos técnicos da organización da regata Tall Ship Races, que terá lugar do 24 ao 27 de agosto na Coruña tras sete anos de ausencia. A rexedora estivo acompañada polo director da regata, Paul Bishop, e a súa directora comercial, Vanessa Mori.

A visita, de carácter técnico, serviu para coñecer as instalacións portuarias onde quedarán amarrados os grandes veleiros na súa estadía na cidade. “Estamos a coordinar os preparativos da cita, que sempre que foi multitudinaria e polo tanto ten cerca complexidade organizativa”, apuntou Inés Rey.

Para esta edición da Tall Ship Races xa está confirmada a participación de 15 barcos de distintas clases e case un milleiro de tripulantes. Este é un evento de referencia mundial que comezará en Reino Unido e, logo do seu paso pola Coruña, continuará ata Lisboa e Cádiz.

A Tall Ship Races é unha regata internacional na que participan veleiros clásicos e que ten como obxectivo fomentar a amizade internacional e o adestramento da mocidade na arte da vela. A tripulación de cada barco que participa está formada por persoas de entre 16 e 25 anos. Como é habitual, durante a estadía dos barcos na Coruña, a cidadanía poderá visitalos e coñecer as súas características.